أسرار الولاية مطوع نشيط
![مطوع نشيط مطوع نشيط](https://2img.net/i/itest/ranks/default/default2.gif)
عدد الرسائل : 51 تاريخ التسجيل : 30/08/2008
![قصة سندريلا بالبحريني عجيبه Empty](https://2img.net/i/empty.gif) | موضوع: قصة سندريلا بالبحريني عجيبه السبت أغسطس 30, 2008 6:48 pm | |
| من صباح الله خير وقت ما الديج يصيح تقوم سندريلا وتخم الحوي وتهشت الدياج والارانب وتنظف مكانهم وتحلب الغنمة على الساعه فمان تروح تسوي الريوق اللي هوه عبارة عن بيض مفيوح وروتي وجبن المفلفات البقرة الضاحكة وتسوي جاي وتحط فيه حليب ابوعلم الساعه فنعش الا يقعدون خواتها الخيب ويا مرة ابوها ويحرطمون يبون الريوق وتروح تحطه ليهم ..
مرة الابو: ويشوو هالبيض يالمقصوفة مارقة ماهي مستويه عدل اني ماحب هالشكل جم مرة اعلمش سندريلا: انزين مرة ابويي انتين تقولين تحبينها هالشكل مرة الابو: اني ماكلت ولا تهرين وهاش انصفعي ابه روحي سوي ليي غيره اسمعي مو تروحين تاكلينها ادري ابش محسرة بتتغيبين بتاكلينها جيبيها باكلها وسوي غيرها
سندريلا: ان شاء الله مرة ابويي
مرة الابو: حريقة تحرقش بعدي صغيره وهيه كل شوي كالت مرة ابويي تمبا تسويني عجوز طايحة الحظ ماتشوفيني ويش حلاوتي احلى منش ومن امش
سندريلا ودمعتها على خدودها: ياعلي ويش سوت ليش امي كله تحرطمين عليها .. رحمش الله ياامي
وتروح ركيض المطبخ وتفلت بعمرها على الارضيه على بالها فلم هندي بتفلت روحها على السرير
سندريلا:آآآآي ظهري ياعلي نسيت انه ماعندي سرير هئ هئ
ومسكينه تكعد تكرف كراف في هالبيت وولما تخلص تروح الى رفيقها جعفرو
سندريلا: جعفر ياعلي متكسره حدي جعفر: يا خلف ابويي ماعليه استحملي سندريلا: اني مادري ويش اسوي في عمري كله يعاملوني هالشكل جعفر في قلبه : انتظريني يا بعد جبدي باخذش انا في البيت ويايي سندريلا: جعفرو جعفرو ويش فيك سرحان جعفر: لا ولا شي انتين اصبري ولا عليش
واهم يسولفون
جان يجي رجال من الحرس مال الامير
الحارس: هاجم جودوا الورقة اقروها زين مازين وانتين ابويي قولي الى البنات جلهم يجون الحفلة جان يعرس هالمقصوف ويفجنا من عوار الراس والحنه والرغيه في القصر
جعفر في خاطره: مشكل قصر وقصر ماصار بيت فيه زريبه حمير وعلى صوب فيه زراعه بقل ورويد
سندريلا: ان شاء الله عمي
الحارس: انتين ويش رنقتش يا بتي ويش حلاوتش تكشخي وتعالي انا متاكد انه بيعجب فيش
سندريلا وخدودها صارو حمران : استحي اني لاتقول ليي هالمفل
الحارس يضحك عليها
جعفر في خاطره يدوس في جبد الحارس
جت المغرب ورجعت سندريلا البيت
وحطت الاعلان على الفلاجة وتجي اختها الدبدوبه تراكض تبغا اكل وتدور المفتاح مال الفلاجة وتشوف الاعلان
زينبو: الااااااااي الامير بيعرس يا خلف جبدي هالحليوووووووووو جان زين لو اخده افادي فيه ويش حلاوته قمرررر جنه همبايه
سندريلا: زينبوو ويش تسوين ويش عندش
زينبو: انتين ماعليش بروح اقول الى سكينه اكو الامير يبي يعرس جان نجهز
سندريلا: ياعليي جيبي الورقة اني امبا اروووووح
زينبو: انجبي محلش ويا فيابش المحمسين هههههههه ريحش مصنه مايباش الامير
سندريلا: اي له ريحتي مفل ريحش يالدبدوبة يامال الفقر كله تبلع تبلع كانها مكنسة اني امبا اعرف الاكل اللي تاكلينه وينه يروح؟
زينبو: زيييين باروح اقول الى امي الحجي اللي تقولينه ليي بخليها تنتفش ولا توديش الحفلة
سندريلا: روحي الحقيها مناك
وراحت زينبو تراوي امها واختها الاعلان
جان سكينه يدور راسها على الامير وتحبب في صورته
سكينه: ياعلي ويش حلاوته قمر ويلي علييييييه اما قومي قومي بنروح الى طوعه بشتري من عندها نفنوف
مرة الابو: انجبي طوعه الحين غالي
سكينه: انزين امااااا ويش اسوي
مرة الابو: روحي شوفي البدله اللي اشتريتها ليش اولاة اللعام
سكينه: ياعلي اماااااه لبسته اكثر من عشرين مرة امبا واحد جديد اكشخ ابه قدام الامير حسن
مرة الابو: انزين روحي اكو تحت فيابي فلافين ربيه اشتري لش ابها ويا اختش
سكينه: ياعلي امااااااه مايكفي انتين تدرين بعد بتش دبدوبة مانحصل ليها فياب خلها اهني في البيت حطي ليها اكل وخلاص اني بروحي بروح
مرة الابو: تغربلش ماينقدر عليش روحي روحي انزين الله وياش امايي خلف ابويي
يوم ثاني بالليل يتجهزون
زينبو: ياعليييي امااااه متغصغص النفنووف ويش اسويييي ماني كادرة اتنفس جتني الضيييييقة وي وي امااااااااه انمششششق عند الاباط النفنوف
مرة الابو: هادا توني مشترتنه ليش يالمركب يالفيلة ماعليه لو انمشق موديل اصلا ولو انمشق منهو بيطالعش يالكورة
زينب: ياعلي اماااااااه لا تحبطيني
وطلعت زينب في الفريق تركض جان تهفت دبتها ودموعها على خدها وجان تدعم في عباسو
عباس: ورييييييييييح فيل داعمني
زينب: مااااالت عليك ياطيح الحظ هئ هئ كله يقولون ليي فيل عساكم الموت كلكم ماحد يحبني هئ هئ
عباس عورت افاده: ااااسف مو قصدي .. انتين منهي؟؟
زينب: اني زينب
عباس يولع الولاعه مالت الجكاير يشوف وجها
عباس: ياعلي حليوة انتين بس دبدوبه
زينب : هئ هئ اول مرة احد يقول ليي حليوة
عباس: صدق حليوة انتين بس لو الدبه اللي توصل قبلش الباب تروح تصيرين احلى وحدة في العالم
زينب: صق؟
عباس: ايي والله العظيم كيفش بتصدقيني ولا لا
زينب : انزين خلاص صدقت
عباس: يالله الحين روحي اركضي لمدة اسبوع ابغي هالحزة بعد اسبوع ضعيفة
زينب: ياعلي مايمدي خلها بعد شهر ويا حفلة الامير
عباس: باال انزين ماعليه .. تعالي باقول ليش انتين بعد تبين الامير؟
زينب: لاا اني مامباه خلاص
عباس: اي اشوة حصلنا لينا مرة كامل بنات الفريق يبونه واحنا مو محقلين لينا وحدة
زينب: ايشوووووووو
عباس: لالا ولاشي هع
بعد شهر وعداب طويل
زينب صارت حليوة رشيقة بعد ماقامت تركض في الفريق وتصوم ولا تاكل شي هفتت عدل صارت ويش حلاوتها وخدودها صارت ويش حلاوتها حمران الحين عباس ان شافها بيستجن
ليلة الحفلة
الكل متكشخ وبيدهبون الى الحفلة
سندريلا : عاااد مرة ابويي احبش اني خليني اجي وياكم
مرة الابو : لااا وين تجين ويانا تفشلين حالتش حاله
سندريلا: والله العظيم مابسوي شي بقعد بره من بعيد اطالع
مرة الابو: جيفه انتين محسرة تقعدين تدندكين من البيبان؟ اقول لش ظلي اهني في البيت ولا عليش ابغي اجي البيت يلق يلمع فاهمة؟
سندريلا: انزييين
مسكينه خلوها بروحها تنظف وتكرف تمشع شعرها وتصطر في روحها وتصيح على افادي
زينبو المقصوفة يدورونها ماشافوها ومشوا عنها
الا ويناهي راحت الى عباسوو وجان يحول عليها ويقول ليها امشي بنعرس الليلة ويا الامير
سندريلا وهيه تصيح راحت تقبع ليها كنار
جان تطلع ليها وحدة
سندريلا: وعمى في قلبش خوبلتيني انتين منهي
الساحرة: سندريلا يالللي ماتستحين اني الساحرة
سندريلا: اي ساحرة بعد؟؟
الساحرة: شوف تسوي روحها ماتعرفني قليلة الاصول ما جأني كل قصة اطلع ليها وسوي ليها نفنوف وامشط كشتها وسويها عروس لكن نكور النعمة يعمة
سندريلا: ياعلي لا تزعلين ويش اسوي نسايه انيييييي كله انسى هالبيت مايخلون ليي باله
الساحرة انزين قومي بس بعدلش وروحي الحفلة خلي الامير يحول عليش
سندريلا وهيه شاقة بوزها : اوكي اوكي يالله
بعد ماسوتها ويش حلاوتها
طلعت بره
شافت هداك البيكب اللي فيه من ورا غنم وجعفر قاعد قدام بيسوق جان يوصلها الحفلة
سندريلا: يووووو جعفر انته بتوديني؟
جعفر: اي >> مسكين في قلبه حسرة
الساحرة: تعي تعي وين بتروحين اسمعي الساعه افنعش انتين في البيت فاهمة؟ ترى تتحولين مكحلفة مرة فانيه واني ماليي خص
سندريلا: اوكي يالله جعفر انطلق
جعفر: انطلق ويش ماصارت هادي بيكب هالساحرة قاصة علينا انا قلت بتخليني في ارمادا في هوندا طلعت محسرة
سندريلا : ههههههههههه انته طالع جوتيي قصير عليي شوي من ورا تقول ليي زين صدق هالساحرة مقصصة
جعفر: لكن ويش حلاوتش تجننين
سندريلا: عساك ريح استحي مو تقول ليي هالحجي
جعفر: ياحلاوتش لما تستحين ههههههههه
دخلت سندريلا القصر
جان حسون يحول عليها
حسن: بااااااال ويش حلاوتها هالبنيه انا هادي اللي باتخلي يطرطق غيرها
سندريلا: سلام عليكم
حسن: عليكم السلام حياش حياش تعالي دخلي يالقمرة
سندريلا في خاطرها: بال شكله زايغ عيون
حسن: حياش دخلي له
سندريلا: ان شاء الله
وقاموا حطوا مواليد والكل يترقص ومستانسين
حسن: انتين ويش اسمش؟
سندريلا: اني اسمي زهره
حسن: ويشششش حلاوة اسمش طالع عليش في الحلاوة
سندريلا: مشكوور ماتقصر من ذوقك
حسن: ياعلي قلبي صاير طبوول مو راضي يوقف تعي مسيه
سندريلا: يو استح على وجهك لا تخلي مرة ابويي تجي تشوفني بتدبحني
طن طن طن جان يرن البليب على الساعه فنعش
وتروح ركيض بتطلع
وتتعرقف مسكينه بنعال جدة حسن
وينفصخ صندلها وتقوم ركيض
حسن قام يصيح الا يبغاها ترجع
حسن: ابوييي ابويي عاددددد مانا مانا اانا امباها
ابو حسن: انزين يالمصفع بنجيبها لك بس ويش اسمها ماقلت ليي وبت منهو دا ويه انا ساحر اعرف كل شي؟
حسن: ويش اسوي مالحقت اسالها ابويي ابغاها لا انتحر
ابو حسن: زين زين بندورها لك بس ماعندك شي يدلنا عليها؟
حسن: ابويي شفت صندلها انفصخ من رجولها لما اتعرقفت بزنوبه جدتي
ابو حسن: جيفه يعني الحين بتروح تلايم بنات الناس يقايسون الصندل؟ اما الا انته تنكة بعد
حسن: انا مو شغلي ابغاهااااااااااااااااااااااااااا
ابو حسن: زين ياولدي روح شوف خذ قياسات عاد اسمع مو وحدة دبدوبة ولا شي تلبسه تفاسحه ههههههههه
حسن: اي تطنز باي
وراحوا يداورون في الفريق ومن يشوف وحدة متينه يهرب يخاف تفاسح الصندل
وصل الى بيت سندريلا
زينب: ويليييييييي الامير حسسسسسسن اهني في البيت لكن ماني طالعه ليه قهرني امس خرب العرس جان اني والعبسي الحين عرسنا عساه ريح
سكينه قامت كانها مصفعه تفتح الباب
سكينه: هاااي امير حسن
حسن: بل هلا هلا تعالي جربي هالصندل مو تنادين اختش المتينه تفاسحه
زينب : حدك عاااااااااد ويش حلاوتي صرت شوف ها المتين انت ويا ابوك يابو كرشة
حسن: نبله صارت ضعيفة اي زين زين بس مو انتين اللي ادورها فارقي
زينب: ويييع
سكينه بتدوب على الباب
حسن: رجولش انتين واجد طويلة مو قدش تباعدي
سكينه: يو قدي شوف شوف هذا صندلي
حسن: شلخش
سندريلا وهيه طايفة عندها قلاص ماي الى مرة ابوها وتشوف حسن ويطيح من عندها
حسن: باال تعورتين ويش فيش جدي مفجوعه
سندريلا: ها لالا ولا شي >> في خاطرها ياعلي جا لعند البيييت
حسن: كاني شفتش امس؟
سندريلا: لالا ماشفتني اني ماطلعت من البيت
حسن: لالالالا انا شفتش متاكد
سندريلا: يوووووو اني اهني في البيت صدقني ماطلعت
حسن: افففف لا تسوين لينا حاكر ماكر وتدلعين لينا في القصة تتغلين انا ادري انتين وهاكو الصندل مالش عندي من وين ماخذتنه؟ من عند فتحيه؟ يالله امشي بنعرس
سندريلا: عساك ريح خربت القصة
حسن: امشي اهووووو
وراحوا القصر وعرسوا وعاشو في سعادة ورفاه وجابو بنات وصبيان خبركم يعني من كثر مايحبها جابو خمس بنات وسته صبيان
اي صحي نسيت
جعفرو حلف مايعرس شعاره ليومنا هذا
عزوبي للابد خخخخخخخ
وزنوب وعباسو عرسوا بعد
سكينه عنست في بيت ابوها
ومرة الابو فتحيه جا ليها واحد شيبه طايحة ضروسه ووافقت عليه >> ماتبي تضيع شبابها خسارة
وسلامتكم | |
|
أســيــ القلوب ـــر مطوع مبدع
![مطوع مبدع مطوع مبدع](https://2img.net/i/itest/ranks/default/default3.gif)
عدد الرسائل : 187 تاريخ التسجيل : 30/08/2008
![قصة سندريلا بالبحريني عجيبه Empty](https://2img.net/i/empty.gif) | موضوع: رد: قصة سندريلا بالبحريني عجيبه الإثنين سبتمبر 01, 2008 10:39 am | |
| مشكوره اختي اسرار الوية على القصة وهي حلوه كثير يعطيك العافية ونتمنا المزيد اسير القلوب | |
|
أسرار الولاية مطوع نشيط
![مطوع نشيط مطوع نشيط](https://2img.net/i/itest/ranks/default/default2.gif)
عدد الرسائل : 51 تاريخ التسجيل : 30/08/2008
![قصة سندريلا بالبحريني عجيبه Empty](https://2img.net/i/empty.gif) | موضوع: رد: قصة سندريلا بالبحريني عجيبه الثلاثاء سبتمبر 02, 2008 1:58 am | |
| بسم الله الرحمن الرحيم
مشكور أ خوي( أسير القلوب) على المرور الرائع
موفقين | |
|
عاشقة الورد مطوع مبدع
![مطوع مبدع مطوع مبدع](https://2img.net/i/itest/ranks/default/default3.gif)
![عاشقة الورد](https://2img.net/u/1712/10/32/77/avatars/2-49.gif)
عدد الرسائل : 181 العمر : 28 الموقع : ಇ السعودية ಇ المزاج : ಇ دلـوعه ಇ تاريخ التسجيل : 23/08/2008
![قصة سندريلا بالبحريني عجيبه Empty](https://2img.net/i/empty.gif) | موضوع: رد: قصة سندريلا بالبحريني عجيبه الثلاثاء سبتمبر 02, 2008 2:11 am | |
| هههههههههههههه
حلووه كثير وعجبتني ساندريلا
يوم شافت الساحره اول مره تضحك
يسلموو
..
..
عاشقة الورد | |
|
معزوفة الأحلام المديره العامة
![المديره العامة المديره العامة](https://2img.net/i/itest/ranks/default/default6.gif)
عدد الرسائل : 171 العمر : 34 المزاج : فايقة و رايقة الأوسمة : ![قصة سندريلا بالبحريني عجيبه W4](https://2img.net/h/www.eshrag.net/vb/images/w4.gif) مزاجي : ![قصة سندريلا بالبحريني عجيبه 8512](https://i.servimg.com/u/f27/11/66/67/10/8512.gif) تاريخ التسجيل : 23/08/2008
![قصة سندريلا بالبحريني عجيبه Empty](https://2img.net/i/empty.gif) | موضوع: رد: قصة سندريلا بالبحريني عجيبه الثلاثاء سبتمبر 02, 2008 2:22 am | |
| ههههههههههههههههههههههه
مشكورة جدا جدا جدا أختي أسرار
أكثر ما عجبني الكلام و الفاء اللي بدل الثاء
كل كلمة فيها فاء قعدت أقول هذي فاء و لا ثاء
ههههههههههههههههه
يعطيكم العافية
معزوفة الأحلام | |
|